තුල්හිරිය MAS කර්මාන්තශාලාවේ තුරුලි ආපනශාලවේ සේවය කළ 65 හැවිරිදි තිදරු පියෙක් කොවිඩ් – 19 ආසාදනය වීම හේතුවෙන් ජීවිතක්ෂයට පත්ව තිබේ.
තුල්හිරිය, පරාක්‍රමගම පදිංචිකරුවෙක් මෙසේ මියගොස් තිබේ. ඊයේ දිනයේදී MAS ආයතනයෙන් කොවිඩ් ආසාදිතයන් 400කට ආසන්න සංඛ්‍යාවක් වාර්තා වූ අතර ඔවුන් ප්‍රතිකාර සඳහා තම වියදමින් යොමුකිරීමට MAS ආයතනය තීරණය කර තිබේ.
ආයතනයේ සේවකයන් ඉදිරි දින වලදී පී.සී.ආර්. සඳහා යොමු කිරීමට කටයුතු කරන බව වරකාපොල මහජන සෞඛ්‍ය පරීක්ෂක කාර්යාලය පවසයි.
ආසාදිතයින් හඳුනාගැනීමත් සමග අදාළ ඇඟලුම් කර්මාන්ත ශාලාව තාවකාලිකව වසා දැමීමට තීරණය කළ බව කෑගල්ල දිස්ත්‍රික් ලේකම් මහින්ද එස් වීරසූරිය මහතා පවසයි.
එම කර්මාන්ත ශාලාවේ සේවක සේවිකාවන් 2000ක් පීසීආර් පරීක්ෂණ සඳහා යොමුකර ඇති අතර එහිදී නව ආසාදිතයින් 400 දෙනා හඳුනාගෙන තිබේ.
මේ පිළිබඳ වැඩිදුරටත් අදහස් දැක්වු දිස්ත්‍රික් ලේකම්වරයා,
“ඇඟලුම් කර්මාන්ත ශාලාවේ කලමනාකාරීත්වයත් ඒ වගේම ආයෝජන මණ්ඩලයේ සභාපතිවරයා සහ අධ්‍යක්ෂ ජනරාල්වරයා සමඟ සාකච්ඡා කරලා, අපේ ආණ්ඩුකාරවරයාගේ හා රාජ්‍ය අමාත්‍ය කනක හේරත් මහතාගේ උපදෙස් පරිදි සෞඛ්‍ය සේවා අධ්‍යක්ෂට දැනුම්දීලා මේ වන විට එම කර්මාන්ත ශාලාව තාවකාලිකව වසා දැමීමට තීරණයක් ගත්තා.“
එම ආසාදිත පුද්ගලයන්ගේ ආශ්‍රිතයන් සෙවීම සඳහා ඔවුන්ගේ පදිංචි ප්‍රදේශයේ මහජන සෞඛ්‍ය පරීක්ෂක නිලධාරීන් සෞඛ්‍ය වෛද්‍ය නිලධාරීන් දැනුවත් කර ඇති බව කෑගල්ල දිස්ත්‍රික් සෞඛ්‍ය සේවා අධ්‍යක්ෂක වෛද්‍ය කුමාර වික්‍රමසිංහ මහතා පවසයි.
