MAS ආයතනය තුල්හිරිය සේවා නියුක්තිකයන් සම්බන්ධව මාධ්‍ය නිවේදනයක් නිකුත් කරයි

තුල්හිරිය ප්‍රදේශයේ පිහිටි කර්මාන්ත ශාලාව වසා දැමීම පිළිබඳ මෑත කාලීන වාර්තා සම්බන්ධයෙන්, නැවත අවධාරණය කරන්නේ සෑම අවස්ථවකදීම MAS ආයතනය රජයේ සෞඛ්‍ය බලධාරීන් සමඟ විනිවිදභාවයෙන් හා සහයෝගයෙන් කටයුතු කරනු ලබන බවයි.

PCR පරීක්ෂණ ප්‍රතිඵල මත පදනම්ව මේ මොහොතේ ආයතනය වසා දමීමට කටයුතු කර ඇත. ආයතනය විසින් ආරම්භ කරන ලද පුළුල් පරීක්ෂණ වැඩසටහනකදී කර්මාන්ත ශාලාවේ සේවා නියුක්තිකයන් 380 ක් කොවිඩ් ආසාදිත බව අනාවරණය වූ අතර සේවා නියුක්තිකයින් 1,505 ක් කොවිඩ් ආසාදිත නොවන බව තහවුරු විය. මෙම පරීක්ෂණ රජයේ අනුමත පෞද්ගලික රෝහලක් විසින් සිදු කරන ලද අතර සියලු ප්‍රතිඵල ප්‍රදේශයේ සෞඛ්‍ය බලධාරීන් වෙත ලබා දී තිබේ.

මෙම කර්මාන්ත ශාලාව නැවත විවෘත කිරීමට කටයුතු කරනු ලබන්නේ ප්‍රාදේශීය සෞඛ්‍ය බලධාරීන් සමඟ සාකච්ඡා කර නියමිත සෞඛ්‍යාරක්ෂිත ක්‍රියාවලීන් අවසන් කිරීමෙන් පසුව පමණි. තුල්හිරිය කර්මාන්ත ශාලාව සහ එහි සෞඛ්‍ය ක්‍රමවේදයන් පිළිබඳව සෞඛ්‍ය අමාත්‍යාංශය මෙන්ම කම්කරු අමාත්‍යාංශය විසින් ඉල්ලා ඇති සියලුම තොරතුරු සහ දත්ත ඔවුන් වෙත භාර දී ඇති අතර ඉදිරියේදීද අවශ්‍ය වූ විටෙක ඉල්ලනු ලබන ඕනෑම තොරතුරුක් ලබාදීමට කටයුතු කරනු ඇත.

තුල්හිරියෙහි තත්වය පිළිබඳව අදහස් දක්වමින් ආයතනයේ ප්‍රකාශකයකු මෙසේ පවසන ලදි: “මෙම තුන්වන COVID-19 රැල්ල අතරතුරදී, COVID ධනාත්මක සේවා නියුක්තිකයන් සංඛ්‍යාව ඇතැම් කර්මාන්ත ශාලාවල සිදුකරන පරීක්ෂණ සංඛ්‍යාවට අනුකූලව සෘජුවම ඉහළ යන බව අපි දුටුවෙමු. තුල්හිරිය කර්මාන්ත ශාලාවෙහි මෑත කාලීන වර්ධනයන්ගෙන් පසුව, MAS ආයතනය සෞඛ්‍ය සේවා අධ්‍යක්ෂ ජනරාල්වරයා සමඟ සාකච්ඡා කොට එවැනි තත්වයන් තුළ නිර්දේශිත ඉදිරි ක්‍රියාමාර්ග මෙන්ම දැනට පවතින 3 වන රැල්ල තුළ අපගේ කර්මාන්ත ශාලාවල සිදු කළ යුතු පරීක්ෂණ මට්ටම තීරණය කරනු ඇත.”

වසංගතයේ මුල් අවධියේදී MAS ආයතනය විසින් COVID-19 සත්කාර මධ්‍යස්ථාන පිහිටුවන ලද අතර, ආසාදිත සේවා නියුක්තිකයින් සහ ඔවුන්ගේ පවුලේ සාමාජිකයන් MAS COVID-19 සත්කාර මධ්‍යස්ථාන සහ වෙනත් අනුමත මධ්‍යස්ථාන වෙත භාරදීමට කටයුතු කරන ලදි. ඔවුන්ගේ වෛද්‍ය සහ දෛනික අවශ්‍යතා මෙන්ම ඔවුන්ගේ පවුල්වල රැකවරණය පිළිබඳවද MAS ආයතනය මැදිහත්ව කටයුතු කරන
ලදි.

ශ්‍රී ලංකාවේ පිහිටි MAS අනුබද්ධ ආයතන 48 ම තුළ සෞඛ්‍ය අමාත්‍යාංශය විසින් නිර්දේශිත COVID-19 මාර්ගෝපදේශ සහ ආරක්ෂිත පියවරයන් දැඩි ලෙස අනුගමනය කරන අතර ප්‍රාදේශීය සෞඛ්‍ය බලධාරීන්ගේ සමීප අධීක්ෂණය යටතේ ඒවා ක්‍රියාත්මක වේ. COVID-19 ආශ්‍රිත සියලුම පරීක්ෂණ MOH විසින් හෝ රජයේ අනුමත පෞද්ගලික රෝහල් හරහා සිදු කරනු ලබන අතර, සියලු ප්‍රතිඵල සහ වාර්තා MOH / PHI වෙත ලබා දෙනු ලැබේ. එබැවින්, අත්හිටවූ හෝ වාර්තා නොකළ අවස්ථා තිබිමට කිසිඳු අවස්ථාවක් නොමැත.

MAS ආයතනය අදාළ සියලු බලධාරීන් සමඟ අඛණ්ඩව සහයෝගයෙන් කටයුතු කරන අතර සේවා නියුක්තිකයින්ගේ සෞඛ්‍යය හා යහපැවැත්ම මෙන්ම ප්‍රජාවන්ගේ ආරක්ෂාව වෙනුවෙන් ඉහළම ප්‍රමුඛතාවය දෙමින් කටයුතු කරනු ඇත.