සංචාරක සේවා ආයතන ලියාපදිංචි කිරීමට අදාළ කොන්දේසි ලිහිල් කිරීමට ශ්‍රී ලංකා සංචාරක සංවර්ධන අධිකාරිය තීරණය කර තිබේ.
සංචාරක සේවා සපයන ආයතන හා පුද්ගලයින් වැඩි වශයෙන් අධිකාරිය සමග සම්බන්ධ කර ගැනීමේ අරමුණින් මෙම තීරණය ක්‍රියාවට නංවන බව එම අධිකාරියේ අධ්යක්ෂ ජනරාල් ධම්මිකා විජේසිංහ මෙනවිය පැවසුවාය.
විශේෂයෙන්ම සංචාරක සේවා ආයතනවල ඉඩම් අයිතිය සම්භන්ධව පවතින කොන්දේසි ලිහිල් කිරීමට අධිකාරියේ අවධානය යොමුව ඇති බවද අධ්යක්ෂ ජනරාල්වරිය පැවසුවාය.
දැනට අධිකාරිය යටතේ ලියාපදිංචි වී ඇති මෙවැනි සේවා ආයතන සංඛ්‍යාව 2500 ක් පමණ වන නමුත් එසේ ලියාපදිංචි නොවුණු ආයතන ගණන 20000 ඉක්මවන බවද ඇය සදහන් කළාය.
මේ පිළිබඳව වැඩිදුරටත් අදහස් දක්වමින් අධ්යක්ෂ ජනරාල්වරිය මෙසේද පැවසුවාය.
සංචාරක සංවර්ධන අධිකාරියෙන් ලබාදෙන සහනවලට හිමිකම් කිව හැක්කේ අධිකාරියේ ලියාපදිංචි වී ඇති ආයතන හා පුද්ගලයින්ට පමණයි. එහෙත් තවමත් බොහෝ සංචාරක සේවා සපයන ආයතන හා පුද්ගලයින් අප යටතේ ලියාපදිංචි වී නොමැති බව නිරීක්ෂණය වී තිබෙනවා . ඊට ප්‍රධාන හේතුවක් වී ඇත්තේ ලියාපදිංචිය සඳහා දක්වා ඇති නිර්ණායක හා කොන්දේසි දැඩි හා සංකීර්ණ වීමයි. එම නිසා අදාල කොන්දේසි ලිහිල් කිරීමට අප අධකාරිය තීරණය කළා.
උදාහරණයක් ලෙස යම් සංචාරක සේවා ආයතනයක් වසර දහයකට වැඩි කාලයක් යම් තැනක පවත්වාගෙන යනවානම් ,ඊට ව්‍යාපාර ලියා පදිංචිය මෙන්ම ග්‍රාමසේවක නිලධාරී හා ප්‍රාදේශීය ලේකම් සහතික කරන ලිපිද ඇත්නම් ඔහුට තාවකාලික අපගේ අධිකාරියේ ලියාපදිංචියක් ලබාදීමට කටයුතු කරනවා .
